ABANCA potencia a súa oficina de Almería con máis tecnoloxía e servizos para o cliente

14-03-2018

ABANCA vén de trasladar a súa oficina en Almería a unha das rúas máis céntricas da cidade, a Avenida Federico García Lorca, 83. A sucursal abriu o pasado luns ao público na súa nova localización e renovada por completo para adaptala ao novo modelo comercial do banco.

O local da Avenida Federico García Lorca foi reformado integramente para implantar o novo modelo de oficina que ABANCA está a incorporar na súa rede comercial. Con este novo deseño, a entidade pretende mellorar a calidade de servizo ao cliente a través dunha atención máis eficiente, áxil, personalizada e especializada.

Especialización

A nova oficina, coa que ABANCA dá servizo a máis de 3.000 clientes, favorecerá o impulso da estratexia de especialización que está a desenvolver a entidade nos últimos anos, xa que a sucursal conta cun espazo dedicado á atención de clientes particulares e outro especializado en empresas. Ademais, posúe espazos máis abertos, modernos e transparentes, cun forte compoñente tecnolóxico e de imaxe. Carece de despachos, e os espazos adáptanse en función do servizo que se preste ao cliente.

O novo deseño contempla mesas de atención personalizada ao cliente e salas de reunións, que outorgan unha maior privacidade. Por último a oficina contará con postos de atención transaccional para a operativa en efectivo e as tarefas máis administrativas. A nova oficina conta cun equipo de 8 profesionais, entre os que figuran xestores especialistas en distintos segmentos. Todo o equipo conta con tabletas Microsoft Surface, que permiten unha total mobilidade para dar unha mellor resposta ás demandas dos clientes.