ABANCA presenta a restauración do mural de Lugrís e a exposición 'Paredes soñadas'

29-03-2017

ABANCA concluíu o proceso de restauración do mural de Urbano Lugrís Vista de A Coruña 1669 na entrada á súa sede na cidade pola rúa Olmos, onde se exhibirá ao público a partir de agora. Coincidindo co fin dos traballos de rehabilitación da pintura, o banco presenta na sede de AfundaciónSerás redirixido a outro sitio web a exposición Lugrís, paredes soñadas, que realiza unha completa revisión do traballo realizado polo artista como decorador de espazos públicos e privados.

Juan Carlos Escotet Rodríguez, vicepresidente de ABANCA, destacou na presentación do mural que este foi o proxecto máis complexo que acometeu ABANCA dentro do seu firme compromiso coa conservación e difusión do patrimonio artístico de Galicia. “asumimos o risco, o custo económico e a responsabilidade desta tarefa porque tiñamos a seguridade de que se non o faciamos nós seguramente esta pintura excepcional perderíase, como ocorreu con outras obras”, resaltou Escotet.

O proxecto de recuperación do mural finaliza tras doce meses de intenso traballo desde que se elaborou o informe técnico que recomendaba o seu traslado a outra localización para garantir o seu futuro.

Para levar a cabo a intervención, dunha gran complexidade técnica polas dimensións do mural -9,10x 2,45 metros- e o procedemento escollido para o seu traslado -stacco a massello, que implica a extracción da pintura co seu soporte-, foi necesario dividir o mural en sete seccións, que unha vez protexidas transportáronse ata a sede de ABANCASerás redirixido a outro sitio web. Cando finalizou a instalación de todas as seccións no novo espazo, a principios de xaneiro, comezou o proceso de rehabilitación da obra, no que traballou o equipo técnico de Arteca durante máis de dous meses.

Lugrís, paredes soñadas

A restauración do mural ofreceu á entidade financeira a oportunidade para reivindicar a figura de Urbano Lugrís dentro da historia da arte galega. Con este obxectivo organizouse a exposición Lugrís, paredes soñadas, comisariada por Rubén Ventureira, xornalista e investigador da obra do artista.

É a primeira vez que se realiza un proxecto expositivo tan completo sobre Urbano Lugrís con este enfoque, a súa faceta como muralista. O laborioso traballo de procura e selección de obra realizado polo comisario en colaboración co equipo de profesionais do banco conseguiu reunir 106 pezas procedentes de particulares, galerías de arte, museos, institucións públicas e privadas e as propias coleccións de arte de ABANCA e Afundación.

Algunhas das obras é a primeira vez que se expoñen en público e outras que orixinalmente formaban un conxunto e agora atópanse en diferentes localizacións volveranse a mostrar tal e como foron concibidas polo artista.

Entre as pinturas que se exhibirán destacan as realizadas por Lugrís para decorar espazos tan variados como o desaparecido Hotel Embaixador (A Coruña), a igrexa de Vilaboa (Culleredo), o Gran Hotel de Vigo ou a fábrica de conservas Massó (Bueu), entre moitos outros.

Entre as obras seleccionadas sobresae o Retablo do descubrimento, un conxunto composto por 13 táboas procedente do antigo Instituto de Cultura Hispánica de Madrid que hoxe se atopan na sede da Agencia Española de Cooperación Internacional para el Desarrollo. Trátase dun políptico cheo de simboloxías que contribúe a enriquecer a exposición.

Outra das novidades que presenta esta mostra é a posibilidade de realizar un tour virtual pola Capela dos Santos Reis de Bueu, un proxecto que o propio Lugrís definiu como a súa “obra integral como artista”, xa que trazou os planos e deseñou a súa ornamentación. A decoración interior do templo foi desaparecendo co paso do tempo pero os que visiten a exposición poderán entrar virtualmente na capela e gozar coa recreación das pinturas que estaban situadas orixinalmente no retablo.

A mostra complétase cunha extensa publicación na que se recompila a historia da pintura mural Vista de A Coruña 1669 e explícase con detalle todo o proceso de restauración. A continuación, ofrécese ampla información da inxente obra realizada polo artista por encargo para decorar diferentes espazos públicos e privados, e finaliza co catálogo das obras que conforman a exposición.

Lugrís, paredes soñadas estará aberta ao público na sede de Afundación da Coruña entre o 31 de marzo e o 2 de setembro. Poderá visitarse gratuitamente de luns a venres, de 12.00 a 21.00 horas, os sábados e festivos de 10.00 a 21.00 horas e os domingos de 11.00 a 15.00 horas. No mesmo horario tamén estará aberta ao público a entrada á sede de ABANCA na cidade pola rúa Olmos, co obxectivo de que aqueles que o desexen poidan contemplar a restauración do mural que dá orixe a este proxecto expositivo.