ABANCA reforza o seu compromiso co sector primario leonés

17-04-2018

ABANCA une forzas co sector primario de León grazas á firma de catro convenios rubricados de maneira individual cos principais sindicatos agrarios da comunidade: UGAL UPA, ASAJA, UCCL e UCALE COAG. Con estes novos acordos o banco e os sindicatos comprométense unha vez máis na axuda aos agricultores para facilitar o acceso ao crédito e o anticipo das axudas europeas.

O protocolo permite aos asociados tramitar con axilidade o cobro das axudas PAC. Ademais, ABANCA pon a disposición dos agricultores un produto financeiro específico que permite cobrar de forma anticipada ata o 90% do importe da axuda, sen comisións nin intereses asociados.

A oferta da entidade financeira tamén inclúe condicións melloradas na contratación doutros produtos como préstamos hipotecarios, anticipos, leasing mobiliario, liñas de comercio exterior, confirming, avais ou liñas de desconto. Ademais, os agricultores asociados poderán gozar das vantaxes do Programa Cero Comisións que o banco ofrece para deixar de pagar polo mantemento de contas e tarxetas, ademais doutros servizos habituais.

Así mesmo, poderanse beneficiar dunha póliza de crédito para financiar as necesidades de liquidez do día a día, cuxa principal vantaxe radica en que pode chegar ata a cinco anos e sen ningún tipo de comisión de formalización. ABANCA tamén ofrece un préstamo específico para os gastos de campaña, cun máximo de 10.000 euros, a tipo de interese cero e cunha comisión de apertura moi competitiva con respecto ao mercado.

Na firma destes acordos participaron o director territorial de ABANCA en León e Asturias, Marcos Lamas Seoane; o director de zona León Centro, Marcos Álvarez Díez; e a directora da oficina en Santa María del Páramo, Rosa del Mar Gallego Fernández. Por parte dos sindicatos, os actos contaron coas firmas do secretario xeral de ASAJA León, José Antonio Turrado Fernández; o presidente de UCCL León, Juan Antonio Rodríguez Ferrero; o secretario xeral de UCALE-COAG León, Apolinar Casteláns Pellitero; e o secretario xeral de UGAL UPA León, Matías Llorente Liébana.

Nos últimos anos ABANCA ratificou o seu compromiso co sector primario leonés e, especificamente, coa agricultura. A entidade financeira levou ao cabo moitas accións para axudar a superar as dificultades ás que se enfrontan os traballadores deste sector. Así, o ano pasado xa se asinaron varios convenios para ofrecer solucións aos agricultores leoneses no arranque das campañas da PAC e da remolacha. Ademais, no mes de maio, ABANCA mobilizou 60 millóns para contrarrestar os efectos das xeadas e a seca no campo. Un ano antes, o banco habilitou unha liña de crédito extraordinaria de 50 millóns de euros ampliables para paliar a crise que sufriu o regadío leonés debido ás copiosas choivas rexistradas desde principio dese ano.

ABANCA Agro: forte compromiso co sector

Coa firma destes convenios, ABANCA reforza o seu compromiso cun sector fundamental dentro da economía do país. A entidade financeira mostrou desde sempre o seu apoio ao traballo e esforzo dos agricultores. Un apoio que se viu reforzado en 2015 cando o banco creou ABANCA Agro, unha división específica con produtos e xestores centrados en actividades agrícolas e gandeiras. Grazas a esta experiencia o banco converteuse na entidade de referencia para o sector agropecuario.

Doutra banda, é tamén destacable a forte presenza que mantén ABANCA en León, onde conta con medio centenar de oficinas e máis de 100 xestores especializados nas solucións financeiras que mellor se adaptan ás características do sector primario.