ABANCA reúne en Vigo á súa rede de axentes para impulsar o seu crecemento
- Francisco Botas: “A canle axencial é unha peza indispensable no modelo omnicanal do banco e está perfectamente aliñada coa nosa estratexia de crecemento diversificado”
O equipo de ABANCA Axentes Financeiros durante a súa reunión en Vigo.
Descarga en alta resolución Serás redirixido a outro sitio web e abrirase nunha nova ventá
ABANCA reuniu hoxe en Vigo ao equipo de ABANCA Axentes Financeiros, unha canle que gañou protagonismo na estratexia de crecemento do banco no negocio patrimonial. O encontro serviu para analizar a evolución do negocio xestionado por esta rede e os retos para os próximos anos, e aproveitouse tamén para recoñecer aos axentes con mellor desempeño en 2025.
A reunión contou coa participación do conselleiro delegado de ABANCA, Francisco Botas, quen reafirmou o papel relevante que desempeña esta canle no modelo de negocio da entidade e na súa estratexia de crecemento. Cualificouno como “unha peza indispensable no modelo omnicanal do banco”, que “está perfectamente aliñada coa nosa estratexia de crecemento diversificado”.
ABANCA acelerou nos últimos tres anos o despregamento da súa rede de axentes cun importante reforzo do equipo de profesionais, o que fixo posible duplicar o volume de negocio xestionado pola canle.
ABANCA Axentes Financeiros, que iniciou a súa actividade en 2021 como unha plataforma complementaria ao resto de redes do banco, focalizou o seu crecemento no asesoramento especializado a clientes con patrimonios medios e altos a través dun modelo diferencial que prima a calidade do servizo. Hoxe por hoxe, os recursos fóra de balance representan o 73% do negocio xestionado por esta rede externa de axentes.
Equipo especializado e orientado ao cliente
A rede de axentes financeiros de ABANCA está formada na actualidade por 37 profesionais cunha dilatada experiencia en asesoramento patrimonial e banca privada, que destacan pola súa orientación ao cliente e a achega de negocio de alto valor engadido. O equipo creceu a un ritmo constante nos últimos anos, de xeito especial, en 2025. O pasado ano, ABANCA foi unha das tres entidades financeiras que incorporou a máis axentes especializados en asesoramento patrimonial no mercado español.
A oferta da canle axencial de ABANCA inclúe unha alta gama de solucións de investimento, aforro e aseguramento, así como produtos e servizos patrimoniais exclusivos de ABANCA Personal e ABANCA Privada. Ademais, co apoio do resto de canles do banco, os clientes poden acceder tamén a través do seu axente ao catálogo de produtos e servizos do banco e ao resto das súas canles de atención, o que lles permite recibir unha resposta integral a todas as súas necesidades financeiras a través dun modelo omnicanal.