ABANCA reúnese en Palma con autoridades e empresarios dentro da súa estratexia de proximidade territorial

18-06-2024

ABANCA celebrou hoxe unha xornada corporativa en Illas Baleares co dobre obxectivo de estreitar lazos coas administracións e o tecido empresarial da comunidade e trasladar aos equipos comerciais do banco neste territorio as liñas de traballo prioritarias para os próximos meses.

Durante a mañá, o presidente de ABANCA, Juan Carlos Escotet Rodríguez, e o conselleiro delegado, Francisco Botas, visitaron o Consell Insular de Mallorca e mantiveron un encontro co seu presidente, Llorenç Galmés. Así mesmo, desprazáronse ao Concello de Palma de Mallorca, onde foron recibidos polo alcalde, Jaime Martínez.

Ambos os encontros serviron para presentar o modelo bancario de ABANCA e a súa estratexia de crecemento na península ibérica. Os directivos explicaron que o banco cumpre este mes dez anos de actividade transformado nunha entidade solvente e rendible, cun dos perfís financeiros máis sólidos do sector, un marcado carácter innovador e un firme compromiso coa responsabilidade social e a sustentabilidade. Tras as últimas operacións corporativas (TARGOBANK e EuroBic), o banco posicionouse como a sétima entidade financeira en España e Portugal, cunha rede comercial ibérica que supera as 900 oficinas.

Nestas reunións, os máximos executivos de ABANCA tamén trasladaron tanto ao Consell como á Alcaldía o interese da entidade financeira por crecer na comunidade autónoma e contribuír a un desenvolvemento socioeconómico máis sostible. ABANCA reforzou de forma significativa, tras a recente integración de TARGOBANK, a súa presenza no arco mediterráneo e conta en Illas Baleares con seis oficinas, unha delas especializada no negocio con empresas, e un equipo de medio cento de profesionais, boa parte dos cales proveñen do Banco de Crédito Balear. O banco presta servizo nesta rexión a máis de 25.000 clientes, cun volume de negocio superior aos 800 millóns de euros.

Apoio á empresa balear

Ademais das visitas institucionais, a axenda da xornada inclúe un encontro con empresarios de distintos sectores representativos da economía balear. Entre outros asuntos, o presidente e o conselleiro delegado de ABANCA analizarán neste evento as perspectivas macroeconómicas actuais e abordarán cos empresarios a evolución favorable que rexistra Baleares, potencia turística e unha das rexións máis dinámicas de España, con crecementos do PIB e do emprego moi superiores á media do país. Do mesmo xeito, os directivos de ABANCA aproveitarán esta cita para ratificar o compromiso do banco co tecido empresarial e poñer á súa disposición o seu modelo de atención para acompañalos na súa transición cara a un modelo económico máis verde e sostible.

ABANCA conta con unidades de negocio especializadas en distintos segmentos de actividade empresarial (ABANCA Empresas e Pemes, ABANCA Corporativa, ABANCA Negocios, ABANCA Agro, ABANCA Mar, ABANCA Energy e ABANCA Next Generation) e un equipo de máis de 1.000 profesionais especializados.

O sector empresarial é o principal destinatario do financiamento de ABANCA, ao representar o 43% da súa carteira de crédito. O banco prioriza o apoio aos sectores económicos estratéxicos, como o turismo, que en Baleares representa o 45% do PIB. ABANCA é unha das entidades de referencia no financiamento ao sector hostaleiro cunha cota de crédito sectorial do 13,4%.

Recoñecemento ao equipo humano

O equipo de ABANCA en Baleares ocupa tamén un punto destacado na axenda da xornada corporativa do banco hoxe na comunidade. Á primeira hora da mañá, o presidente e o conselleiro delegado mantiveron unha reunión de traballo con profesionais da rede comercial na rexión e responsables das direccións territorial e de zona para compartir a estratexia e liñas de negocio prioritarias para os próximos meses, e recoñecer o esforzo e desempeño dos equipos.