ABANCA súmase á Global Money Week cunha nova actividade de educación financeira

18-03-2025

ABANCA e a súa Obra Social Afundación súmanse esta semana á celebración da Global Money Week, un evento de carácter internacional organizado pola OCDE para concienciar da importancia da educación financeira, cunha nova iniciativa dirixida a estudantes de diferentes etapas educativas.

A proposta preséntase baixo o título ‘Maratón de retos financeiros’ e amplía o programa de educación financeira que desenvolven o banco e Afundación desde 2015. O curso pasado 202.492 persoas participaron nas diferentes actividades organizadas no marco deste programa.

‘Maratón de retos financeiros’ consiste nunha serie de sesións formativas en centros escolares nas que os estudantes poñerán a proba os seus coñecementos en educación financeira a través de actividades gamificadas. Nos encontros abordaranse temas como a ciberseguridade, o consumo responsable ou as finanzas persoais.

Para poder afrontar estes retos, os alumnos e alumnas contarán co apoio dos responsables territoriais de ABANCA de cada zona xeográfica, que lles explicarán previamente conceptos financeiros básicos adaptados ao seu nivel académico, poñeranlles exemplos de situacións reais e resolverán todas as dúbidas que poidan ir xurdindo durante a actividade.

En total, están previstas once sesións entre o mércores 19 e o martes 24 nas que participarán 250 estudantes de Educación Primaria, Secundaria e Formación Profesional de Galicia, Castela e León, Estremadura, Madrid, País Vasco e Murcia, territorios onde o banco conta cunha presenza significativa.

En concreto, a actividade desenvolverase no IES Arcebispo Xelmírez de Santiago de Compostela (19 de marzo), Colexio Marista La Inmaculada de Lugo (20 de marzo), Colexio Otxarkoaga de Bilbao (20 de marzo), CEIP Curros Enríquez da Coruña (21 de marzo), Colexio Plurilingüe Sagrado Corazón de Jesús de Pontevedra (21 de marzo), Colexio Divina Pastora de León (21 de marzo), Colexio Losada de Vigo (21 de marzo), IES Los Barruecos de Cáceres (21 de marzo), Colexio Marista Santa María de Ourense (21 de marzo), CEIP San Andrés de Murcia (21 de marzo) e o CEIP Nuria Espert de Madrid (25 de marzo).

O obxectivo desta nova proposta formativa é promover a educación financeira a través dunha experiencia lúdica e educativa que vai reforzar as competencias dixitais dos participantes, así como a súa capacidade para tomar decisións financeiras responsables. Ademais, permitiralles desenvolver habilidades fundamentais para identificar e xestionar riscos en contornas dixitais, como fraudes e ciberataques, e contribuirá a fomentar o pensamento crítico e colaborativo, xa que terán que abordar situacións coas que se poden atopar na vida real.

Outras iniciativas en marcha

ABANCA e Afundación van intensificar tamén esta semana na que se celebra a Global Money Week as outras actividades que forman parte do seu programa de educación financeira. Entre elas, o ciclo de conferencias ‘Preparados para dar o salto’, co que ABANCA e Afundación achegan a educación financeira a centros educativos de secundaria. O luns 24 de marzo haberá dous relatorios, nos centros CIFP Fraga do Eume (Pontedeume) e CIFP Ferrolterra (Ferrol).

Tamén están previstas iniciativas dirixidas ao público escolar, como o Gran Prix Financeiro, un xogo que permite aos escolares de 3º a 6º de Educación Primaria empezar a familiarizarse con conceptos financeiros básicos que serán fundamentais ao longo da súa vida. Escolares do CPR Lar de Vigo gozarán desta proposta durante os días 20 e 21 de marzo.

Por último, o venres 21 celebrarase en Madrid a final do programa de simulación empresarial Young Business Talents, no que competiron ao longo de todo o curso máis de 11.000 estudantes preuniversitarios.

En total, está previsto que participen en todas as iniciativas organizadas esta semana preto de 800 estudantes.