ABANCA transforma a súa oficina principal en Vilagarcía para reforzar a especialización

02-03-2018

ABANCA transformou a súa oficina principal en Vilagarcía, situada na Praza de Galicia, para adaptala ao novo modelo comercial do banco e convertela no centro de referencia da entidade en Arousa e O Salnés. A mellora permite integrar no renovado espazo os clientes e empregados da oficina da rúa Covadonga, localizada a apenas 80 metros de distancia.

O local de Praza de Galicia, de case 400 metros cadrados repartidos en dúas plantas, foi reformado integramente para implantar o novo modelo de oficina que ABANCA está a incorporar na súa rede comercial. Con este novo deseño, a entidade pretende mellorar a calidade de servizo ao cliente a través dunha atención máis eficiente, áxil, personalizada e especializada.

Especialización

A actuación favorecerá, primordialmente, o impulso á estratexia de especialización que está a desenvolver a entidade nos últimos anos. Posibilita un cambio cualitativo na especialización da oferta da entidade, na súa aposta por unha atención máis personalizada e por dar respostas adaptadas a cada segmento de clientes. A nova oficina conta cun equipo de 16 profesionais, entre os que figuran xestores especializados en pemes, xestores e asesores de banca persoal e xestores previsión e planificación social.

Esta oficina, que será o centro de referencia da entidade en Arousa e O Salnés, conta con espazos máis abertos, modernos e transparentes, cun forte compoñente tecnolóxico e de imaxe. Carece de despachos, e os espazos adáptanse en función do servizo que se preste ao cliente.

O novo deseño contempla seis mesas de atención personalizada ao cliente e catro salas de reunións, que outorgan unha maior privacidade. Por último a oficina contará con cinco postos de atención transaccional para a operativa en efectivo e as tarefas máis administrativas. O equipo da oficina conta con tabletas Microsoft Surface, que permiten unha total mobilidade para dar unha mellor resposta ás demandas dos clientes.

Grazas a esta reforma, increméntase a dotación de caixeiros automáticos da oficina. As novas instalacións albergan na entrada un “Pool de autoservizo 24 horas” con tres caixeiros de última xeración que, ademais de retiradas, permitirán realizar ingresos en firme, pagos de recibos en efectivo e outras operativas con moedas. A oficina mantén, ademais, un caixeiro exterior con acceso desde a rúa da Baldosa.

O novo modelo de oficina implantado tamén permite gañar en axilidade á hora de realizar as operacións máis habituais, así como en oferta de servizo a disposición dos clientes. As instalacións, dotadas cunha rede WIFI gratuíta, contan cun xestor de benvida, un dispositivo que acolle e informa o cliente para que, se o desexa, poida seleccionar a operación e profesional polo que desexa ser atendido, á vez que racionaliza os tempos de espera.

Liderado consolidado

Con esta nova actuación, ABANCA potencia a súa posición de liderado en Vilagarcía, con cinco oficinas, e tamén en Arousa e O Salnés, zonas ás que presta servizo a través dunha vintena de oficinas.

ABANCA conta coa maior rede de oficinas e xestores en Galicia, cunha oferta que cobre a máis do 98% da poboación. En 94 municipios da comunidade, ABANCA é o único banco con servizos financeiros. Na provincia de Pontevedra, a cobertura da entidade financeira chega ao 99,8% da poboación.