ABANCA únese a Pensium para ofrecer aos mayores unha solución para pagar a residencia co aluguer da súa vivenda

26-10-2021

ABANCA ampliou a oferta do seu programa ‘Vive a Vida’, dirixido ao colectivo de persoas maiores, cun novo servizo enfocado a atender necesidades derivadas da dependencia. Grazas a un acordo con Pensium, a entidade financeira pon á disposición dos seus clientes a innovadora solución impulsada por esta compañía, que rendibiliza mediante o alugueiro a vivenda da persoa dependente para que poida complementar os seus ingresos e, desta forma, sufragar o custo dunha praza nun centro xeriátrico.

O novo sistema de financiamento diríxese especialmente a persoas maiores de 75 anos con vivenda en propiedade que, polo seu grao de dependencia, requiren de axuda para as tarefas habituais do seu día a día. Mediante esta nova fórmula, a persoa maior cede a Pensium a xestión do alugueiro da súa vivenda e, a cambio, este anticípalle o importe necesario para cubrir o gasto da súa asistencia xeriátrica (ata o dobre do alugueiro mensual).

Grazas a esta alternativa, a familia pode cubrir o custo dunha residencia sen gastar os seus aforros nin poñer en risco a propiedade da vivenda do maior. No caso de que sexa necesario, poden financiar tamén reformas no inmoble para alugar, así como os seguros.

O novo servizo, personalizado para cada cliente, xa está dispoñible na rede de oficinas e web de ABANCA. Tras a súa contratación, a persoa maior dependente ten garantidas ata dez anos, cos alugueiros presentes e futuros, as achegas necesarias para completar o pago do centro xerontolóxico, aínda que nalgún momento non haxa inquilinos na súa vivenda. Ademais, a familia ou os herdeiros poden cancelar o programa en calquera momento, liquidando a débeda pendente.

Compromiso social

Ao incorporar esta nova oferta ao seu programa ‘Vive a Vida’), ABANCA reafirma o seu compromiso social co colectivo de persoas maiores e ofrécelle unha solución que dá resposta á necesidade de recursos económicos que comporta a dependencia. En concreto, esta nova fórmula intégrase no bloque do programa denominado ‘Asistencia’, do que tamén forman parte, entre outros, o servizo de teleasistencia no fogar e o seguro de dependencia.

Ademais destas solucións de asesoramento e asistencia, a oferta de ‘Vive a vida’ inclúe unha ampla gama de produtos e servizos dirixidos a persoas maiores de 55 anos, que dan cobertura ás súas necesidades e demandas financeiras, de lecer ou goce do tempo libre e crecemento persoal.

Sobre Pensium

Pensium é unha empresa B CorpTM cunha clara vocación de impacto social, que naceu a partir dun equipo de profesionais do sector de residencias, economistas, avogados e traballadores sociais, que se uniron para idear unha nova solución para o crecente número de persoas maiores dependentes. Tras meses de traballo pensando no benestar das persoas maiores e as súas familias naceu o Programa Pensium, como unha solución totalmente nova que permite pagar o custo da asistencia privada sen gastar os seus aforros e sen ter que desembolsar ningún diñeiro.

En 2020 Pensium gañou o primeiro premio mundial nos premios á Innovación Social que anualmente outorga a Fundación Mapfre.

Sobre ABANCA

ABANCA é unha entidade financeira con sede en Galicia que, desde a súa orixe, sitúa a responsabilidade social como un dos seus eixos estratéxicos. Mantén un firme compromiso coa sociedade e a contorna natural nas que opera, e concibe a sensibilidade social como un elemento inseparable da súa actividade financeira.

Neste modelo, as persoas maiores son un dos colectivos de atención prioritaria para o banco, un segmento de crecente peso en España e, particularmente, na comunidade galega. ABANCA é experta na atención a este colectivo, xa que presta servizo a preto de 800.000 clientes maiores de 55 anos, ademais de ter domiciliadas en Galicia unha de cada dúas pensións de xubilación.