DBRS mellora un chanzo o rating de ABANCA até BBB high con perspectiva estable

A axencia de cualificación DBRS Ratings GmbH (DBRS Morningstar) aumentou un chanzo o rating emisor a longo prazo de ABANCA de BBB a BBB high, á vez que mantivo a súa perspectiva estable. O rating emisor a curto prazo incrementouse de R-2 (high) a R-1 (low).

Na súa decisión, a axencia recoñeceu a mellora continua e a diversificación dos ingresos recorrentes, apoiados por unha adecuada integración das adquisicións realizadas nos últimos anos. DBRS tamén destacou na súa avaliación que a calidade dos activos da entidade (mellor que a dos seus comparables nacionais) foi determinante para decidir esta nova subida de rating.

Tendencia positiva a pesar da contorna económica actual

Ao longo dos últimos meses, a pesar da complicada contorna económica, a traxectoria de ABANCA segue sendo valorada positivamente por todas as axencias de rating que a cualifican, o que a converteu na entidade que máis mellorou as súas cualificacións nos últimos anos. ABANCA conta desde abril de 2022 con grao de investimento nos ratings das catro axencias que a cualifican: Moody´s, Fitch, DBRS e S&P. No caso de DBRS, a nova cualificación sitúase só un chanzo por baixo do rango A (low) - A (high).