‘Lugrís, paredes soñadas’ supera os 3.000 visitantes na primeira semana de exposición

07-04-2017

A exposición ‘Lugrís, paredes soñadas’ recibiu en total 3.028 visitas na primeira semana de apertura desde a súa inauguración o xoves 30 de marzo. A proposta de ABANCA e Afundación, deseñada como complemento á restauración do mural ‘Vista da Coruña 1669’ que se pode contemplar na oficina principal do banco na cidade, xerou unha gran expectación entre o público, que pode gozar por primeira vez de moitas das obras que o artista deseñou para decorar determinados espazos públicos e privados.

O éxito de asistencia nestes primeiros días confirma o atractivo do proxecto expositivo e o interese que esperta o traballo deste xenial pintor surrealista que se converteu xa nunha referencia dentro da historia da arte galego.

Trátase da exposición máis completa que se realiza sobre a faceta de Lugrís como muralista. O traballo de procura e selección de pinturas realizado polo comisario Rubén Ventureira conseguiu reunir 106 obras, moitas das cales non se expuxeron ao público ata este momento. Ademais, outras que na actualidade atópanse en localizacións diferentes pódense contemplar agora na súa disposición orixinal, tal e como foran concibidas polo artista.

En liña coa vocación didáctica que guía os proxectos de ABANCA, nesta exposición poderase ampliar información sobre a maioría das pinturas que se mostran e mesmo levar a exposición no teu móbil grazas á app gratuíta ‘Colección de Arte’. Esta aplicación, dispoñible para dispositivos móbiles tanto Android como iOS, utiliza a tecnoloxía de realidade aumentada e permite acceder á ficha artística da obra, afondar na biografía do autor, consultar outros cadros presentes na mostra, gardalos nunha listaxe de favoritos ou mesmo compartilos en redes sociais con só enfocar a obra coa cámara do dispositivo móbil.

‘Lugrís, paredes soñadas’ e o mural recuperado poderán visitarse na sede de Afundación da Coruña e a oficina principal de ABANCA na cidade ata o 3 de setembro, en horario de luns a venres de 12.00 a 21.00 horas, os sábados e festivos de 10.00 a 21.00 horas e os domingos de 11.00 a 15.00 horas.

Obradoiros infantís en Semana Santa

Como complemento ao proxecto expositivo ABANCA e Afundación organizaron un completo programa educativo que ten como obxectivo dar a coñecer este artista entre os máis pequenos. Ás actividades dirixidas a escolares súmase agora durante a época de Semana Santa a organización de obradoiros abertos a todos os nenos e nenas.

A oferta inclúe dúas propostas diferentes:

'Patrulla escolar ao rescate de sereas', dirixida a pequenos de 4 a 6 anos. Desenvolveranse o luns 10 de abril, de 10.30 a 12.00 horas, e o martes 11 de abril, de 12.00 a 13.30 horas. Nesta actividade os participantes deberán devolver unha serea perdida de Lugrís ao mar. Durante esta misión coñecerán especies mariñas, personaxes míticos e ata ao mesmísimo Colón.

No segundo taller, ‘Restaurando a Lugrís’, nenos e nenas de entre 7 e 12 anos coñecerán o oficio de restaurador de arte. Levarán a cabo unha investigación sobre as obras de Lugrís para a continuación “restaurar” unha delas. Desenvolverase tamén os días 10 de abril, de 12.00 a 13.30 horas, e 11 de abril, de 10.30 a 12.00 horas.

Despois do período vacacional de Semana Santa continuará o programa de obradoiros dirixidos a escolares. Os centros interesados nesta oferta didáctica poden facer as súas reservas no teléfono 981 185 060 ou a través do enderezo electrónico areaeducativacoruna@afundacion.org.