Moody’s sitúa a ABANCA en grao de investimento con perspectiva estable
- A axencia resalta a resiliencia, a calidade dos activos, a solvencia e as expectativas de rendibilidade de ABANCA
- É a terceira axencia que lle dá categoría de investimento ao banco despois de Fitch e DBRS
Descarga en alta resolución Serás redirixido a outro sitio web e abrirase nunha nova ventá
A axencia de cualificación Moody’s Investor Service aumentou un chanzo o rating a longo prazo (Long - term Bank Deposits) de ABANCA de Ba1 a Baa3, situándoo en grao de investimento, á vez que mantivo a súa perspectiva estable. O rating a curto prazo (Short - term Bank Deposits) mellora de Not Prime a P-3 ("Prime-3"). O resto de cualificacións de ABANCA foron afirmadas sen cambios.
Tras esta decisión, ABANCA conta con grao de investimento nos ratings de Moody’s, Fitch e DBRS. O cambio na cualificación comunicado por Moody’s débese á nova metodoloxía da axencia e ao recoñecemento pola súa banda do perfil financeiro de ABANCA, que considera estable no actual contexto económico. Moody’s resalta na súa cualificación a resiliencia, a calidade dos activos, a solvencia e as expectativas de rendibilidade de ABANCA.
Tendencia positiva
En 2021, a traxectoria de ABANCA está a ser valorada positivamente polas axencias de rating. Tres das catro axencias que cualifican á entidade emitiron avaliacións sobre ABANCA durante este ano. Delas, dúas (DBRS e Standard and Poor’s) melloraron a perspectiva, mentres que a terceira (Moody’s) comunicou unha subida de rating, situándoo en grao de investimento.