RESULTADOS 1T 2021: ABANCA alcanza os 100.000 millóns de negocio e obtén un beneficio de 137 millóns, un 8,2% máis que o ano anterior

21-04-2021

ABANCA obtivo no primeiro trimestre de 2021 un beneficio atribuído de 137,4 millóns de euros, un 8,2% máis que no mesmo período do ano pasado.

O arranque do ano puxo de manifesto a súa capacidade de xeración de ingresos recorrentes, que creceron un 10,7%, así como a súa posición de liderado no sector por calidade de activos, cun cociente de morosidade do 2,0% e unha cobertura de activos dubidosos do 83,4%.

Tras a integración contable de Bankoa e a adquisición da rede española de Novo Banco, ABANCA superou os 100.000 millóns de euros de volume de negocio. A operación de Novo Banco, sexta de ABANCA desde 2014, fortalece o seu posicionamento en banca persoal e fóra de Galicia.

Desde o inicio da pandemia, ABANCA formalizou máis de 3.200 millóns de euros en créditos ICO e aplicou medidas de flexibilización financeira para familias por importe de 1.200 millóns de euros.

No terreo da sostibilidade, ABANCA seguiu dando pasos na construción do seu modelo de banca responsable e sostible e coa súa contribución ao desenvolvemento social e á protección ambiental.

Calidade da carteira

ABANCA continúa sendo a mellor entidade do sistema financeiro español por calidade de activo. Os activos dubidosos reducíronse un 19,5% (un 24,1% sen Bankoa), co que a taxa de morosidade situouse no 2,0%, á cabeza do sector e practicamente a metade que a media española (3,9%) e por baixo da media europea.

Esta elevada calidade crediticia ten unha das súas bases na diversificación sectorial, algo especialmente relevante no actual contexto económico. Ademais, o principal mercado da entidade, a comunidade de Galicia, continúa mostrando un mellor comportamento que o conxunto de España tanto en termos de indicadores macroeconómicos como de evolución da pandemia.

A taxa de cobertura de dubidosos é do 83,4% (destacando especialmente a taxa de cobertura do 107,0% en pemes e grandes empresas). Combinando provisións e solvencia, ABANCA presenta un cociente Texas do 27,2%, claramente por baixo do 30%, o que acredita a súa posición como a primeira entidade financeira española en canto a calidade crediticia.

Crecemento de ingresos recorrentes

A marxe básica creceu un 10,7% interanual como resultado do bo comportamento da marxe de intereses e os ingresos por prestación de servizos bancarios. A marxe de intereses mellorou un 9,5%, mentres que os ingresos por prestación de servizos aumentaron un 13,7%.

Este bo desempeño viuse complementado pola mellora da eficiencia, que posibilitou duplicar a marxe de explotación recorrente fronte ao mesmo período do ano anterior. Illando o efecto das integracións (Bankoa), os custos ordinarios reducíronse nun 7,9% grazas aos proxectos de racionalización e ás sinerxías procedentes das integracións de negocios realizadas, que se situaron por encima dos obxectivos fixados.

O custo do risco, situado no 0,26%, mantense contido grazas ao esforzo realizado durante 2020 en anticipación de provisións e á boa calidade crediticia da carteira.

Volume de negocio

ABANCA eleva o seu volume de negocio un 20,2% e o sitúa por encima dos 100.000 millóns, tendo en conta a recente adquisición de Novo Banco España. Sen ter en conta esta última adquisición, cuxa integración contable se producirá en próximos trimestres, a entidade alcanzou os 98.487 millóns de euros, un 15,1% máis que hai un ano, grazas ao crecemento equilibrado do crédito e os recursos de clientes.

A carteira de crédito a clientes en situación normal, onde destaca o peso do financiamento a familias e empresas, situouse en 42.068 millóns de euros tras un crecemento interanual do 13,2% (8,5% sen Bankoa). Os recursos de clientes alcanzaron os 55.783 millóns de euros tras crecer un 17,1% (11,4% sen Bankoa). Os depósitos de clientes, principal compoñente da estrutura de financiamento do banco, creceron un 15,2% (10,9% sen Bankoa) e alcanzaron os 44.551 millóns de euros.

Os seguros e a captación de recursos fóra de balance mostran un comportamento igualmente dinámico. O fóra de balance creceu un 25,7% (13,2% sen contar Bankoa), cun incremento da cota de mercado de 16 p.b. en fondos de investimento, de 11 p.b. en plans de pensións e de 4 p.b. en seguros vida aforro. ABANCA alcanzou unha cota de mercado do 3,6% no total de subscricións netas de fondos de investimento no trimestre en España.

As primas de seguros xerais e vida risco creceron un 13,4%, cun comportamento moi homoxéneo nos diferentes segmentos. Vida risco creceu un 14%, pagos protexidos un 13%, saúde un 12% e empresas un 9%.

Solvencia e liquidez

En materia de solvencia, o cociente de capital de ABANCA quedou situado no 17,4% (13,3% capital máxima calidade CET1). Grazas a unha estrutura de capital diversificada, a entidade dispón de amplos colchóns sobre os requisitos establecidos: 510 p.b. (1.614 millóns) en capital total e 534 p.b. (1.688 millóns de euros) en CET1.

A entidade dispón así mesmo dunha cómoda posición de liquidez baseada en depósitos minoristas, principal compoñente da súa estrutura de financiamento, da que supón o 72% do total. A entidade presenta un cociente de créditos sobre depósitos minoristas (LTD minorista) do 95,9% e dispón de 17.511 millóns de euros entre activos líquidos (12.041 millóns) e capacidade de emisión de cédulas (5.470 millóns). Con iso cobre catro veces os seus vencementos previstos de emisións.

Os cocientes de financiamento neto estable NSFR e de cobertura de liquidez LCR están situados, respectivamente, no 129% e o 259%, niveis que cumpren amplamente cos requisitos regulatorios de Basilea III.

Apoio financiero a empresas e familias

A estratexia de apoio integral de ABANCA á sociedade para afrontar as consecuencias económicas do COVID-19 traduciuse na formalización de operacións de financiamento con aval do ICO por importe de 3.234 millóns de euros (1.821 millóns para pemes e autónomos e 1.413 millóns para empresas) durante a pandemia.

Adicionalmente, ABANCA aplicou a familias e empresas medidas de flexibilización de pagos por importe de 1.268 millóns de euros, dos cales 855 millóns corresponden a hipotecas e 414 a outras operacións de financiamento. Desta maneira, o apoio da entidade chegou ao 5,7% da carteira de hipotecas e ao 5,9% da carteira de préstamos ao consumo.

A peche de marzo, os saldos vivos de moratorias outorgadas a clientes ascenden ao 4,6% da carteira de hipotecas e 1,8% da carteira de préstamos ao consumo. É destacable o bo comportamento crediticio por parte dos clientes cuxas moratorias xa expiraron. Menos do 2% entraron en mora, o que referenda a utilidade destes mecanismos para axudar a familias e empresas.

A sostibilidade no centro da estratexia

ABANCA vén desenvolvendo nos últimos anos diversas actuacións para fomentar a creación dun modelo económico máis sostible e exercer un papel activo na transformación da sociedade. ABANCA é un dos signatarios fundadores dos Principios de Banca Responsable de Nacións Unidas e adheriuse tanto ao Compromiso Colectivo para a Acción Climática promovido por UNEP FI, como ao Acordo polo Clima alcanzado polas principais entidades financeiras españolas na COP25 de Madrid.

O banco foi a primeira entidade financeira española en asinar os Principios de Investimento Responsable e os Principios para un Océano Sostible, dúas iniciativas de ámbito internacional promovidas por Nacións Unidas.

Durante o primeiro trimestre de 2021 ABANCA conseguiu o certificado de AENOR de Residuo Cero para as súas sedes corporativas e converteuse na primeira entidade financeira que colabora co proxecto Datadis para integrar e optimizar o consumo de enerxía. Ademais fortaleceu a súa oferta de actividades de educación financeira coas que anualmente chega a unhas 100.000 persoas de todas as idades.

Por outra banda, a través de Afundación, a Obra Social de ABANCA, lanzouse o programa Plancton para fomentar a conservación e sostibilidade das actividades socioeconómicas desenvolvidas en catro das Zonas de Especial Protección para as Aves de ámbito mariño existentes en Galicia dentro da Rede Natura 2000.