RESULTADOS 3T 2019: ABANCA gaña 401,9 millóns cunha rendibilidade do 11,5%

29-10-2019

ABANCA obtivo no primeiros nove meses de 2019 un beneficio neto de 401,9 millóns de euros. Este resultado tradúcese nun ROE do 11,5%, cifra que continúa situando a ABANCA entre as entidades máis rendibles do sistema financeiro español.

Os ingresos recorrentes crecen un 6,9% grazas á boa evolución do negocio con clientes, destacando o dinamismo comercial mostrado nas novas formalizacións con pemes e autónomos, que crecen un 6,8% interanual, e na nova produción de seguros, que aumenta un 7,4%.

A entidade conseguiu captar máis de 80.000 novos clientes no que vai de ano grazas ao foco posto en mellorar a experiencia de cliente, reforzando as ferramentas de escoita e medición de experiencia nos momentos claves da venda. Como resultado, ABANCA mellorou ata situarse entre as dúas mellores entidades españolas en atención comercial.

O balance da entidade recolle por primeira vez a consolidación de Banco Caixa Geral, que contribúe a situar o volume de negocio de ABANCA en 84.751 millóns de euros e a base de clientes en 2,3 millóns.

A taxa de morosidade segue sendo unha das mellores do sistema financeiro español e sitúase no 3,1% grazas á recuperación constante dos activos dudosos.

A sólida traxectoria que mostra ABANCA é avalada tanto polas melloras de rating outorgadas polas axencias como pola gran demanda que reciben as súas emisións nos mercados. En outubro, ABANCA lanzou a súa segunda emisión de instrumentos Tier2, que conseguiu colocar en menos de dúas horas cunha sobredemanda de tres veces o seu importe.

Rendibilidade

A marxe de intereses alcanza os 424,1 millóns no primeiros nove meses do ano, o que supón un incremento do 5,1% interanual explicado principalmente pola boa evolución do negocio con clientes.

Dentro desta boa evolución destaca o crecemento das formalizacións de crédito con pemes e autónomos (+6,8%), un dos colectivos prioritarios na estratexia da entidade. Outros segmentos especializados como os seguros e o financiamento ao consumo tamén rexistran importantes crecementos nos seus ritmos de produción (+7,4 e +21,8% respectivamente).

Os ingresos por prestación de servizos rexistran un crecemento do 12,6%, con especial fortaleza das liñas de máis valor para o cliente, como son os produtos de investimento fóra de balance, que crecen un 18,0%. Os ingresos por servizos de cobros e pagos aumentan un 11,0% e os ingresos por servizos bancarios un 8,7%.

O banco mantén un elevado ritmo de investimento en tecnoloxía enfocado a potenciar as súas capacidades tecnolóxicas e de negocio, impulsando a eficiencia pola vía de reforzar os ingresos recorrentes en paralelo á contención dos gastos de explotación.

O custo do risco (CoR) mantense entre os mellores do sistema (0,20% vs 0,31% do sistema), reflectindo a prudencia aplicada nas políticas de concesión de risco.

Negocio

Tras a consolidación de Banco Caixa Geral, ABANCA sitúa o seu volume de negocio no limiar dos 85.000 millóns de euros tras crecer un 22,6% interanual. Esta operación (á que se une a integración de Deutsche Bank PCB Portugal realizada no segundo trimestre), fai que ABANCA sitúese como sétimo banco español por recursos propios.

A adquisición de Banco Caixa Geral, do mesmo xeito que a de Deutsche Bank PCB Portugal, supón un claro exemplo de negocio de valor complementario coa estratexia do banco, xa que outorga un gran potencial de xeración de ingresos no negocio con empresas, nas operacións cross border con Portugal e en rexións onde o banco tiña unha presenza máis reducida, como Estremadura, reforzando o perfil ibérico da entidade.

O crecemento é equilibrado tanto en crédito, que aumenta un 23,5% ata os 35.784 millóns, como en captación de recursos, que o fai nun 22,3% ata os 47.939 millóns. Descontando o negocio de ABANCA en Portugal e a achega de Banco Caixa Geral, o crecemento do crédito sitúase no 4,5%, mentres que os recursos increméntanse nun 4,3%.

Dentro da carteira de crédito gaña presenza o segmento de empresas, que forma, xunto aos clientes particulares, o core do negocio da entidade.

Captación de recursos

Polo que respecta aos recursos de clientes, os depósitos aumentan un 16,5% (un 4,3% sen contar o negocio en Portugal e a achega de Banco Caixa Geral) grazas ao impulso xerado pola captación de novos clientes. A entidade logrou captar 80.000 novos clientes no ano, cifra á que hai que sumar outros 200.000 procedentes das dúas integracións realizadas no ano, para situar a base total de clientes en 2,3 millóns.

Mención especial merece o incremento rexistrado na captación de recursos fóra de balance: un 51,1% nos últimos doce meses grazas ao bo desempeño dos seus produtos e ás mencionadas adquisicións.

Os fondos de investimento son un dos epígrafes máis destacados, cunhas subscricións netas positivas de 167 millóns euros fronte á tendencia de descenso (-214 millóns) mostrada polo conxunto do sistema. Oito de cada dez fondos comercializados por ABANCA xeran unha rendibilidade superior á media dos seus competidores.

A actividade aseguradora, pola súa banda, recibiu un forte impulso por parte de ABANCA para reforzar a súa capacidade de innovación. A nova produción de seguros xerais crece un 18,8% interanual, mentres que as primas por seguros de vida fano nun 5,9%.

Calidade do risco e saneamento

ABANCA segue mellorando a calidade da súa carteira e sitúa a súa taxa de morosidade no 3,1%, tendo en conta as recuperacións orgánicas levadas a cabo durante o trimestre e a operación de venda de carteira de activos dubidosos formalizada en outubro.

Os saldos dubidosos redúcense un 7,3% en termos interanuais (23,6% illando os movementos derivados do negocio en Portugal e de Banco Caixa Geral) á vez que a taxa de cobertura mantense en niveis moi robustos do 57,8%.

Solvencia e liquidez

ABANCA dispón dunha posición de liquidez de 13.969 millóns de euros entre activos líquidos e capacidade de emisión de cédulas. Esta cifra cobre máis do dobre dos vencementos totais de emisións. Os cocientes de financiamento neto estable NSFR e de cobertura de liquidez LCR sitúanse no 125% e o 189% respectivamente, cumprindo así cos requisitos regulatorios fixados en Basilea III.

Os depósitos minoristas, que representan o 78% do total de estrutura de financiamento da entidade, mostran a clara vocación minorista da entidade. O cociente LTD (préstamos/depósitos) sitúase no 96,8% denotando a sa estrutura de financiamento que presenta ABANCA.

A entidade mantén a súa sólida posición de solvencia. O cociente de capital total alcanza o 16,0% phase in. O capital de máxima calidade (CET1) quedou situado no 13,1% phase-in. A entidade presenta un superávit de capital de 1.326 millóns de euros por encima dos requisitos regulatorios a nivel CET1.

A posición de capital viuse reforzada coa recente emisión de 300 millóns de débeda subordinada cualificada como Tier 2, que se pechou o 7 de outubro. Esta emisión contou cunha gran acollida a tenor da rápida demanda de máis de 1.000 millóns recibida en menos de 2 horas. Con esta emisión, ABANCA completa os requisitos de instrumentos computables como Tier2 e avanza co seu calendario de emisións previsto de cara ao cumprimento dos requisitos MREL previstos para 2022.

Ratings: segue a tendencia á alza

O bo desempeño da entidade traduciuse en novas accións positivas de rating no período.

En xullo, DBRS elevou o rating a longo prazo de ABANCA un chanzo, de BBB (low) a BBB, e o rating a curto prazo de R-2 (middle) a R-2 (high), ambos con perspectiva estable, afianzando a ABANCA dentro da categoría de investimento.

En setembro, Standard and Poor´s mellorou a valoración de ABANCA elevando a perspectiva do rating de estable a positiva. O rating emisor a longo prazo foi afirmado en BB+, a un chanzo do grao de investimento, e o de curto prazo en B. ABANCA é a entidade que acumula maior número de melloras de rating, apoiando o seu sólido desempeño nos últimos exercicios.